Fimmtudagskvöldið 19. nóvember munu Breiðfirðingafélagið og Barðstrendingafélagið halda sameiginlegt hagyrðingakvöld í Breiðfirðingabúð að Faxafeni 14 klukkan 20:00

Aðgangseyrir er 1000 kr og innifalið er kaffi og meðlæti.

Við verðum með sjö flotta og skemmtilega hagyrðinga sem eru að semja um ýmis efni þessa dagana og munu leyfa okkur að heyra afraksturinn þetta kvöld.

Þeir eru:

• Einar Óskarsson
• Hjörtur Þórarinsson
• Hlíf Kristjánsdóttir
• Jóhannes Gíslason
• Kristján Jóhann Jónsson
• Ólína Gunnlaugsdóttir
• Ólína Kristín Jónsdóttir

Að auki munu Guðmundur Arnfinnsson og Guðjón D. Gunnarsson senda vísur en þeir eiga ekki heimangengt.

Stjórnandi verður Jóhanna Fríða Dalkvist.

Fólk í sal fær tækifæri til að botna nokkra fyrriparta og verða verðlaun veitt fyrir besta botninn.

Fyrripartarnir eru birtir hér fyrir neðan.

Hlökkum til að sjá ykkur!

Á böllunum var feikna fjör
í fögrum Bjarkarlundi.

Bolaspað og brennivín
bændur kunna að meta.

Bráðum kemur betri tíð
með blóm í laut og runni.

Mönnum er í geði glatt
á góðra vina fundi.

Hagyrðinga hérna sé,
að heyra býsna góðir/fljótir (hér má hver og einn velja sér endingu í annarri línu)

Nú er vetur, nálgast jól,
nóttin lengist óðum.

Ýmsum finnst það stórfelld stund
að stara á norðurljósin.

Bók að lesa ljúf er iðja
á löngu kvöldi.

Það er okkur bæði ljúft og skylt að koma eftirfarandi fréttatilkynningu á framfæri fyrir Bókaútgáfuna Hóla.

Það var nú bara svona er ævisaga Jóns Magnússonar, skipstjóra og athafnamanns á Patreksfirði, skráð af Jóhanni Guðna Reynissyni. Þetta er baráttusaga manns sem var ekki hugað líf fljótlega eftir fæðingu, hætti að reykja 12 ára gamall og hefur farið sínar eigin leiðir í lífinu og berst þá ekki alltaf með straumnum. Jón er landsþekktur skipstjóri og aflamaður en fyrstu árin voru þyrnum stráð þar sem fyrir kom til dæmis að móðir pilts, sem hann vildi fá með sér á sjóinn, mætti þessum unga skipstjóra í dyragættinni með hnífinn á lofti. Þau hjónin, Jón og Lilja Jónsdóttir, hafa rekið Odda hf. og Vestra ehf. á Patreksfirði um árabil og aldrei selt eitt aukatekið kílógramm af kvóta frá útgerðum sínum. Starfseminni er fyrst og fremst ætlað að afla byggðarlaginu lífsbjargar og veita fólkinu þar eins trygga atvinnu og auðið er.

Það er okkur ljúft og skylt að láta vita af einu og öðru sem tengist okkar heimahögum og þykir okkur vænt um að fá að vita af hlutum sem eiga hugsanlega heima hér á síðunni okkar.

Við fengum bréf í vikunni sem okkur langar að koma á framfæri, en það er svohljóðandi:

“Elskulegu Barðstrendingar nær og fjær. 

Þessa dagana stendur yfir söfnun fyrir nýju sýningarkerfi í Skjaldborgarbíó, nú er svo komið að allar nýjar kvikmyndir sem berast til landsins eru á stafrænu formi en í Skjaldborg er bara gömul filmuvél og því ekki hægt að sýna nýjar kvikmyndir.

Heildarkostnaður verkefnisins er u.þ.b. tíu milljónir og þegar hafa safnast átta milljónir. Til að ná síðustu tveimur milljónum sem vantar upp á hefur verið blásið til söfnunar á www.karolinafund.com og þar er hægt að styrkja verkefnið um allt frá 2.860 krónum.

Til að minna á söfnunina verða ýmsir viðburðir í boði á söfnunartímanum, sem stendur yfir til 5. desember, og við viljum sjá sem flesta í Skjaldborg og í Bíó Paradís.
Fylgist með á facebook síðunni okkar: Nýtt sýningarkerfi í Skjaldborgarbíó, lækið, deilið og síðast en ekki síst…..styrkið. Það munar um allt.”

Hinn árlegi fjáröflunardagur Kvennadeildar Barðstrendingafélagsins verður haldinn í:

Breiðfirðingarbúð Faxafeni 14, 
laugardaginn 31. október 2015
kl. 14:00.

Margt góðra muna í boði sem og happdrætti og kaffihlaðborð að venju.

Verð er aðeins
1.500 kr fyrir fullorðna,
500 kr. fyrir börn 6-12 ára,
en frítt er fyrir yngri en 6 ára.

Munið lyftuna!!!

Hlökkum til að sjá ykkur.

Kvennadeildin